Welcome to Surxonstat   Click to listen highlighted text! Welcome to Surxonstat Powered By GSpeech

Oʻzbekiston Respublikasi Prezidenti Shavkat Mirziyoyev raisligida 30-iyun kuni odil sudlovni taʼminlash va korrupsiyaga qarshi kurashish borasidagi vazifalar muhokamasiga bagʻishlangan videoselektor yigʻilishi oʻtkazildi.

Ushbu ustuvor masalalar yuzasidan oʻtgan 3 yilda 20 dan ortiq qonun, farmon va qarorlar qabul qilindi. Islohotlar natijasida sudlar tomonidan ilk marotaba 2 ming 273 nafar fuqaroga nisbatan oqlov hukmi chiqarildi. Shuningdek, jinoyat yoʻliga bilib-bilmay kirgan 3,5 mingdan ortiq yoshlar va xotin-qizlarga nisbatan ozodlikdan mahrum qilish jazosi qoʻllanmasdan, ular mahalla va jamoatchilik kafilligiga olindi. Inson huquqlarini buzganligi uchun 60 nafar huquq-tartibot idoralari xodimlari jinoiy javobgarlikka tortildi.

Yigʻilishda taʼkidlanganidek, bunday oʻzgarishlar odamlarimizda haqiqat va adolatga boʻlgan ishonchni mustahkamlamoqda. Lekin xalq sud-huquq tizimidan rozi deyishga hali asos yoʻq.

Ayniqsa, Andijon shahar va Chiroqchi tuman ichki ishlar idoralarida yaqinda sodir boʻlgan fojiali holatlar tizim rahbarlarini uygʻotishi, aniq xulosalar qilishga chorlashi kerakligi qayd etildi. Hozirda jinoyatlarga aloqador 11 nafar ichki ishlar xodimlari qonun oldida javob bermoqda. 7 nafar rahbar lavozimidan ozod etildi, yana 16 tasi intizomiy javobgarlikka tortildi.

Oliy Majlis palatalari yetakchilari boshchiligida parlament aʼzolari joylarda xalq bilan ochiq muloqot oʻtkazgan paytda jamoatchilik ushbu yoʻnalishlardagi mavjud adolatsizliklarni ochiq-oydin bayon qilgan.

Ushbu tajriba asosida, bundan buyon deputat va senatorlar oʻzlari saylangan hududlarda sudyalar korpusi, sektor rahbarlari va jamoatchilikni jalb qilgan holda Odil sudlovga koʻmaklashish va korrupsiyaga qarshi kurashish boʻyicha muntazam ravishda muloqotlar oʻtkazib boradilar.

Aholi tomonidan koʻtarilgan adolatsizlik holatlari va muammolar har chorakda mahalliy kengashlarda tanqidiy muhokama qilinib, mutasaddilar oldiga aniq savollar qoʻyiladi va masʼuliyatiga baho berib boriladi.

Oliy Majlisdagi maxsus qoʻmitalar har bir hududning odil sudlov va korrupsiya masalalariga oid reytingi yuritilishiga bosh-qosh boʻlib, har yarim yilda natijalari boʻyicha parlament eshituvlari va tekshiruvlarini oʻtkazib boradi.

Inson huquqlari markazi, Ombudsman, Toshkent davlat yuridik universitetiga “Inson qadr-qimmati - eng oliy qadriyat” maxsus oʻquv moduli boʻyicha barcha huquq-tartibot idoralari rahbar xodimlarini oʻqitish vazifasi yuklatildi.

Hozirgi tergov sifati va xodimlar malakasi talabga javob bermasligi taʼkidlandi. Misol uchun, joriy yilning 5 oyida tergov organlari asossiz ayb qoʻygan 323 nafar fuqaro sudlar tomonidan oqlangan, 1 ming 854 nafar shaxsga nisbatan qoʻyilgan asossiz ayblovlar olib tashlangan. Oʻtgan yilning oʻzida 236 nafar oqlangan shaxsga davlat hisobidan 6,7 milliard soʻmlik moddiy va maʼnaviy zarar toʻlab berilgan.

Maʼlumki, sudyalik lavozimini egallash uchun muayyan ish stajiga ega boʻlish, Sudyalar oliy maktabini oʻqib tugatish kabi talablar qoʻyish orqali tanlov kuchaytirildi.

Endi tergovchilikka nomzodlarga ham shunga oʻxshash talablar qoʻyilishi kerakligi qayd etildi. Jumladan, bir qator mutasaddi idoralarga Tergov institutini tashkil etish, tergovchilik kasbini egallashga mutlaqo yangi talablarni ishlab chiqish, sohaga ilgʻor tajriba va standartlarni joriy etish vazifalari qoʻyildi.

Yana bir muhim masala – huquq-tartibot idoralarida ishlarning tergovga aloqadorligi buzilib ketgan. Xususan, shunday jinoyat turlari borki, ularni har qanday tergov idorasi tergov qilishi mumkin boʻlsa, ayrim moddalar esa qaysi tergov organiga mansubligi qonunda koʻrsatilmagan.

Shuningdek, 2018-2019-yillarda birinchi instansiya sudlarida jami 192 ta jinoyat ishi boʻyicha 307 nafar shaxs oqlangan boʻlsa-da, hech qaysi holatda prokuror ayblovdan voz kechmagan. Shu bois tergov jarayonidagi xatolar sud majlisida aniqlansa, prokuror sudning tugashini kutib oʻtirmasdan, oʻz tashabbusi bilan ayblovdan voz kechadigan tartib joriy etilishi lozimligi qayd etildi.

– Sud binosiga kelgan har bir inson Oʻzbekistonda adolat borligiga ishonib chiqib ketishi kerak. Bu Prezident talabi! – deya taʼkidladi davlatimiz rahbari.

Biroq, joriy yilda aholidan kelib tushgan murojaatlarning 8 mingdan ziyodi yoki 44 foizida sudlarda ishlar toʻliq va xolis koʻrilmayotgani, uzoq muddat choʻzilayotgani bildirilgan.

Yana bir misol, 2019-yilda iqtisodiy sudlarda apellyatsiya, kassatsiya va nazorat tartibida koʻrilgan ishlarning 2,5 mingdan ortigʻi, yaʼni 44 foizi bekor qilingan yoki oʻzgartirilgan. Bu har ikki shikoyatdan biri boʻyicha tuman va viloyat iqtisodiy sudi chiqargan qarorlar yuqori sudda oʻzgarayotgani, tadbirkor va investorlar sarson boʻlayotganidan dalolat beradi.

Mutasaddilarga ilgʻor tajribalar va xalqaro standartlar asosida sud tizimini “bir sud – bir instansiya” tamoyili asosida qayta koʻrib chiqish topshirigʻi berildi.

Sud tizimida eskilik sarqiti boʻlgan, oʻz nomi bilan ham sudning mazmun-mohiyatiga toʻgʻri kelmaydigan “nazorat tartibida ishlarni koʻrish” amaliyotidan toʻliq voz kechiladi.

Prezident Shavkat Mirziyoyev sudyalarning adolatli qaror qabul qilishlariga taʼsir oʻtkazuvchi barcha omillarni, shu jumladan Oliy sud raisi va Bosh prokurorning protest keltirish huquqini bekor qilish taklifini ilgari surdi. Parlament palatalari ushbu taklifni koʻrib chiqadi.

Sudlar chiqarayotgan qarorlar faqat sud majlisida tekshirilgan dalillarga asoslanishi lozimligi taʼkidlandi. Ayrim sudyalar tergov materiallariga bogʻlanib qolgani, bu esa qonun, sud va davlat obroʻsiga putur yetkazishi qayd etildi. Odil sudlov xalqning koʻz oʻngida, ochiq-oshkora amalga oshirilib, adolat qaror topishi lozimligi aytib oʻtildi.

Davlatimiz rahbari, shuningdek, sudga borish uchun ayrim tuman va shaharlarimizda odamlarga qulaylik yaratish zarurligi haqida gapirdi. Misol uchun, aholisi eng koʻp tumanlardan biri boʻlgan Urgutda (500 ming kishi, 102 ta mahalla) fuqarolik sudi yoʻqligi sababli 80 kilometr yoʻl bosib, Toyloq tumanlararo sudiga boriladi.

Shu bois sudlar va ularning faoliyatini optimallashtirish boʻyicha topshiriqlar berildi.

Xususiy mulk qonun va sudning kafolatli himoyasida boʻlishi zarur.

Oxirgi bir yarim yil ichida sudlar tomonidan hokimlarning yer ajratish, bino-inshootlarni buzish va xususiylashtirishga oid 1 ming 730 ta qarori bekor qilingan.

Sud orqali yer munosabatlari bilan bogʻliq mingta, uy-joy buzilishiga doir 51 ta, xususiylashtirishga oid 62 ta holatda fuqarolar va tadbirkorlarning huquqlari tiklangan.

Xususiylashtirish natijalarini qayta koʻrib chiqishni bekor qilish, umuman, davlat idoralarining bunday tashabbus bilan chiqishiga yoʻl qoʻymaslik va bu qonunda mustahkamlanishi kerakligi koʻrsatib oʻtildi.

Yerga boʻlgan huquqlar kafolati kuchaytirilib, mulkiy huquqlarni bekor qilish faqat sud tartibida hal etilishini qatʼiy belgilash zarur, dedi Prezident.

Viloyat, tuman (shahar) hokimlari, barcha sektor rahbarlari oʻz hududlarida ushbu talablarga qatʼiy amal qilinishini taʼminlashi shartligi qayd etildi.

– Bir narsani bilinglar – sarmoya kiritayotgan investor birinchi navbatda oʻz huquqlari sud orqali kafolatli himoya qilinishiga eʼtibor beradi. Hamma rahbarlar qulogʻiga quyib olsin: sud faoliyatiga aralashishga hech kimning haqqi yoʻq, – deya taʼkidladi Shavkat Mirziyoyev.

Sudyaning faoliyatiga toʻsqinlik qilgani va adolatsiz qaror chiqarishga majburlagani uchun javobgarlikni kuchaytirish boʻyicha qonun loyihasi ishlab chiqiladi.

Maʼlumki, odil sudlovning ajralmas qismi – advokatura, ushbu institutning adolat qaror topishidagi oʻrni beqiyos.

Oʻzbekistonda bugun 4 ming atrofida advokat faoliyat koʻrsatib, 8,5 ming aholiga oʻrtacha bitta shunday mutaxassis toʻgʻri kelmoqda.

Advokatlarning 43 foizi Toshkent shahrida faoliyat koʻrsatayotgan boʻlib, viloyatlarning 20 ta tumanida birorta ham advokatlik firmasi roʻyxatdan oʻtmagan.

Advokatlik faoliyatini boshlashi uchun yosh mutaxassislardan 2 yil yuridik staj talab etishni bekor qilish, talabalikdan advokat yordamchisi sifatida amaliyot oʻtash tartibini joriy etish kerakligi taʼkidlandi. Yuridik oliy oʻquv yurtlarida “advokatlik faoliyati” mutaxassisligi boʻyicha magistrlar tayyorlanadigan boʻldi.

Davlat tomonidan taqdim etilgan advokatlarni tanlashning ochiq-oshkora tartibi yoʻqligi bois ayrim tergovchilar oʻziga tanish advokatlarni chaqirib, ayblanuvchiga taʼsir oʻtkazish hollari uchrab turadi. Masalan, Toshkent shahrida davlat tomonidan advokatlarga oʻtgan yili 7 milliard soʻmdan ziyod mablagʻ ajratilgan boʻlsa, ushbu mablagʻning teng yarmi 20 ta advokatlik firmasiga berilgan (jami 746 ta shunday firma mavjud).

Shu sababli tegishli vazirliklarga davlat hisobidan yuridik yordam koʻrsatadigan advokatlarni elektron tanlash tizimini ishga tushirish topshirigʻi berildi. Bu dastlab poytaxtimizda eksperiment tariqasida joriy etiladi.

Shuningdek, oʻta ogʻir jinoyatda ayblanayotgan shaxslarning ishi boʻyicha, undan tashqari, qamoqqa olish yoki uy qamogʻi tarzidagi ehtiyot chorasini qoʻllash masalasi koʻrib chiqilayotgan holatlarda ham advokat ishtirokini majburiy etib belgilab qoʻyish lozimligi koʻrsatib oʻtildi.

Advokatlik faoliyati jozibadorligini oshirish, bu kasb egalarining himoyasi va kafolatini kuchaytirish boʻyicha qonun hujjatlari paketini ishlab chiqib, muhokamaga olib chiqiladi.

Sud faoliyatida raqamli texnologiyalarni keng joriy etish bugungi davr talabidir. Joriy yil yakuniga qadar Oliy sudda yagona “Adolat” axborot tizimlari kompleksini ishga tushirish vazifasi yuklatildi.

Bunda barcha uchun sudlarga elektron murojaat qilish, murojaatlar holatini onlayn tarzda kuzatish, taraflarga maʼlumotlarni elektron shaklda yuborish imkoniyati yaratiladi.

Sudlar joriy yilda videokonferensiya aloqa tizimi bilan 100 foiz qamrab olinishi lozimligi taʼkidlandi.

Videoselektor yigʻilishida navbatdagi muhim masala – korrupsiyaga qarshi kurash borasida islohotlar muhokama qilindi.

Jumladan, 143 ta davlat xizmatlari elektron shaklga oʻtkazilib, 35 ta idorada talab qilinadigan hujjatlar soni va xizmat koʻrsatish vaqti 2 hissa qisqardi. Byudjet xarajatlari, davlat xaridlari, yer, bino va inshootlarni oldi-sotdi qilish jarayonlariga oshkoralik va ochiqlik tamoyillari joriy etildi.

Maʼlumki, kecha, 29-iyun kuni Oʻzbekiston Respublikasi Prezidenti Korrupsiyaga qarshi kurashish agentligini tashkil etish haqidagi farmonni qabul qildi.

Agentlik tarmoq va hudud rahbarlari bilan birga quyidagi vazifalarni amalga oshiradi.

Birinchidan, barcha viloyat, tuman (shahar) hokimlari oʻz hududlarida, tarmoq rahbarlari oʻz tizimlarida Agentlik bilan birga bir oy muddatda Korrupsiyadan holi dasturini ishlab chiqadi. Bunda ochiqlik va oshkoralikni taʼminlash hamda sohalarni raqamlashtirish eng asosiy vazifa boʻladi.

Ikkinchidan, korrupsiyaning oldini olishda taʼsirchan parlament va jamoatchilik nazorati yoʻlga qoʻyiladi. Jumladan, Agentlik korrupsiyaga qarshi kurashish ishlarining holatini tahlil qilib, har yili Prezident va Oliy Majlis palatalariga milliy hisobot kiritib boradi.

Shuningdek, Agentlik keng jamoatchilik, ommaviy axborot vositalari, fuqarolik jamiyatining boshqa institutlari bilan birga aholi va tadbirkorlarning korrupsiyaga munosabatini oʻrganib borishi va davlat idoralari faoliyatini baholab borishi kerakligi koʻrsatib oʻtildi.

Uchinchidan, korrupsiyaga qarshi kurashishda kadrlar tayyorlash masalasiga jiddiy eʼtibor beriladi. Buning uchun Davlat boshqaruvi akademiyasi va Toshkent davlat yuridik universitetida korrupsiya muammolarini oʻrganish boʻyicha alohida oʻquv moduli, maxsus kafedra va magistratura mutaxassisligi ochiladi. Shuningdek, rahbar xodimlar, ayniqsa, hokimlarning bu boradagi bilim va koʻnikmalarini shakllantirish boʻyicha malaka oshirish kurslari tashkil etiladi.

Mutasaddilar yigʻilishda muhokama qilingan masalalar ijrosini tashkil etish yuzasidan axborot berdi.

O'zA

 

Аziz oʼgʼil-qizlarim!

Barchangizni yurtimiz hayotidagi qutlugʼ bayram – Yoshlar kuni bilan samimiy tabriklab, oʼzimning chuqur mehrim va ezgu tilaklarimni bildirishdan gʼoyat mamnunman.

Bugungi kunda mamlakatimizda yangi Oʼzbekistonni barpo etishga qaratilgan ijtimoiy-siyosiy, iqtisodiy islohotlarni amalga oshirishda azmu shijoatli yoshlarimizning oʼrni va taʼsiri tobora ortib borayotgani hammamizni quvontiradi.

Hayotimizning barcha soha va tarmoqlarida, Vatan himoyasidek sharafli vazifani ado etishda millionlab yoshlarimiz sadoqat va fidoyilik bilan xizmat qilmoqda. Siyosiy saviyasi yetuk, mustahkam fuqarolik pozitsiyasiga ega yuzlab yigit-qizlar parlamentimiz va xalq deputatlari mahalliy kengashlarining aʼzosi sifatida davlat va xoʼjalik boshqaruvi organlari hamda mahalliy hokimiyat idoralarida rahbarlik lavozimlarida faoliyat koʼrsatmoqda.

Respublikamizda samarali ishlayotgan 227 mingga yaqin yosh tadbirkor va fermerlar, mohir hunarmandlar iqtisodiyotimiz taraqqiyotiga munosib hissa qoʼshmoqda. Yurtimizda ularni har tomonlama qoʼllab-quvvatlash uchun zarur sharoitlar yaratilmoqda.

Bu haqda gapirganda, birgina “Yoshlar – kelajagimiz” dasturi doirasida yosh avlod vakillarining 7 ming 775 ta biznes loyihasiga 1 trillion 635 milliard soʼmdan ziyod imtiyozli kredit mablagʼlari ajratilib, shu asosda 40 mingga yaqin yangi ish oʼrni tashkil etilganini qayd etish lozim.

Аna shunday eʼtibor va gʼamxoʼrlik tufayli hududlarda 27 ta “Yosh tadbirkorlar” kovorking-markazlari hamda 157 ta “Yoshlar mehnat guzari” foydalanishga topshirildi. Ushbu majmualarda 2 ming 200 nafardan ortiq oʼgʼil-qizlarimiz oʼz tadbirkorlik faoliyatini boshlagani eʼtiborlidir.

Shu bilan birga, “Har bir yoshga – bir gektar” loyihasi boʼyicha barcha hududlarimizda 65 mingga yaqin yosh dehqonlarga 54 ming 232 gektardan ziyod yer ajratildi.

Аna shunday muhim chora-tadbirlar tufayli soʼnggi uch yilda 560 ming 200 nafarga yaqin yosh fuqaro ish bilan taʼminlandi.

Bu yil koronavirus pandemiyasi hamda Buxoro va Sirdaryo viloyatlarida roʼy bergan ofatlar butun el-yurtimiz qatori yoshlarimiz irodasini ham sinovdan oʼtkazdi. Аna shunday ogʼir vaziyatlarda ming-minglab oʼgʼil-qizlarimiz chinakam mardlik va jasorat koʼrsatib, barcha tengdoshlariga oʼrnak boʼldilar.

Xususan, mamlakatimizda tashkil etilgan “Saxovat va koʼmak” umumxalq harakatining asosiy ishtirokchilari ham yoshlarimiz ekani, Harakat doirasida Oʼzbekiston yoshlar ittifoqining 4 ming 500 nafar aʼzosi koʼngilli sifatida faol ish olib borayotgani tahsinga loyiqdir.

Sardoba suv omboridagi toshqindan talofat koʼrganlarga yordam va koʼmak koʼrsatish maqsadida Yoshlar ittifoqining xayriya karvoni tashkil etilib, aholiga kiyim-kechak, sanitariya vositalari, oziq-ovqat mahsulotlari, shuningdek, katta miqdordagi oʼquv qurollari va sport anjomlari, badiiy adabiyotlar yetkazib berildi.

Oʼz navbatida, bunday ezgu ishlar Buxoro viloyatining kuchli dovuldan zarar koʼrgan Olot va Qorakoʼl tumanlarida ham amalga oshirilgani sizlarning vatanparvarlik va olijanoblik fazilatlaringizdan dalolat beradi.

Fursatdan foydalanib, ogʼir sinov kunlarida xalqimizga haqiqiy tayanch va suyanch boʼlib maydonga chiqqan Qurolli Kuchlarimizning mard va matonatli harbiy xizmatchilariga, jonkuyar shifokorlar, bunyodkor quruvchilar, saxovatli tadbirkorlarimizga, ilm-fan, madaniyat va sport sohasi vakillariga, Yoshlar ittifoqining faol aʼzolariga – barcha Oʼzbekiston yoshlariga chin qalbimdan minnatdorchilik bildiraman.

Vatanimiz, el-yurtimiz sizlar kabi fidoyi va jasur farzandlari bilan hamisha faxrlanadi!

 

Muhtaram yosh doʼstlarim!

Bugungi kunda zamonaviy ilm-fan va yuqori texnologiyalarni mukammal egallash har qanday davlat va jamiyat taraqqiyotining

hal qiluvchi shartiga aylanib borayotgani hech kimga sir emas. Аna shu haqiqatni chuqur anglagan holda, biz navqiron avlodimizning ham jismoniy, ham maʼnaviy jihatdan barkamol boʼlib voyaga yetishi uchun bor kuch va imkoniyatlarni safarbar etmoqdamiz.

Shu maqsadda ulugʼ allomalarimiz nomidagi ixtisoslashtirilgan maktablar, Innovatsion rivojlanish vazirligi qoshida Yoshlar akademiyasi, Fargʼona shahrida “Loyihalar fabrikasi” faoliyati yoʼlga qoʼyilgani, Prezident va ijod maktablari boʼyicha dasturlarimiz izchil davom ettirilayotgani sizlarga yaxshi maʼlum.

Iqtidorli yoshlarni yanada qoʼllab-quvvatlash uchun har bir hududda Yoshlar texnoparklarini barpo etishni boshladik. Umumiy qiymati 30 milliard soʼmdan ortiq boʼlgan “Yosh olimlar” amaliy va innovatsion loyihalar tanlovi eʼlon qilindi.

Karantin sharoitiga qaramasdan, 6 milliondan ortiq maktab oʼquvchilari, 468 ming talaba oʼquv dasturlarida belgilangan darslarni oʼz vaqtida va sifatli oʼzlashtirdi. “Online-maktab” loyihasi doirasida 17 ta fan boʼyicha 4 mingdan ortiq telemashgʼulotlar oʼtkazildi.

Bu jarayonga eng malakali pedagoglar jalb etildi, jumladan, Toshkentdagi Prezident maktabining xorijlik mutaxassislari tomonidan ham mahorat darslari olib borildi. Imkoniyati cheklangan bolalarni oʼqitishga alohida eʼtibor qaratilib, barcha darslar surdopedagog va surdotarjimonlar tomonidan tushuntirib borildi.

Oʼzbekistonning bu tajribasi YuNESKO, YuNISEF, Jahon banki kabi xalqaro tashkilotlar tomonidan eʼtirof etilmoqda.

Bugungi shiddatli zamonda, global miqyosda raqobat kuchayib borayotgan murakkab vaziyatda yuksak intellektual salohiyatga ega kadrlarga ehtiyoj har qachongidan ham ortib bormoqda. Shu bois biz oʼz oldimizga qoʼygan ulkan va masʼuliyatli vazifalardan kelib chiqib, mamlakatimiz oliy taʼlim tizimida tub oʼzgarishlarni amalga oshirmoqdamiz.

Jumladan, keyingi uch yilda respublikamizdagi oliy oʼquv yurtlari soni 60 foizga oshib, 116 taga yetdi. Ular orasida nufuzli xorijiy universitetlarning filiallari borligi alohida eʼtiborga loyiq. Mamlakatimizda oliy taʼlim muassasalariga qabul kvotalari soni izchil oshirib borilmoqda. Аgar 2016-2017 oʼquv yilida bu raqam

58 mingtani tashkil etgan boʼlsa, joriy yilda 150 mingtaga yetadi. Yaʼni, bu yil maktab bitiruvchilarining 25 foizi oliy oʼquv yurtlarida oʼqish imkoniga ega boʼladi. Holbuki, 2017 yilda bu raqam 9 foizga teng edi.

Millat genofondini saqlash va davom ettirishning muhim omili boʼlgan yosh oilalarni qoʼllab-quvvatlash masalasi doimo eʼtiborimiz markazida boʼlib kelmoqda. Soʼnggi uch yilda 2 ming 668 ta yosh oilaga uy-joy uchun 121 milliard 244 million soʼm boshlangʼich toʼlov mablagʼlari 20 yil davomida foizsiz qaytarish sharti bilan toʼlab berildi.

Barchamiz guvohmiz – bugun dunyo misli koʼrilmagan surʼatlar bilan keskin oʼzgarib bormoqda. Ijtimoiy hayotimizda koʼplab ijobiy jarayonlar bilan birga, yosh avlodning qalbi va ongini egallashga qaratilgan maʼnaviy tahdidlar ham tobora xavfli tus olmoqda.

Bunday murakkab vaziyatda farzandlarimizni zararli taʼsirlardan asrash, doimo hushyor va ogoh boʼlib yashash eng dolzarb vazifamiz boʼlib qolmoqda.

Yoshlarimizni ona Vatanimizga, mustaqillik gʼoyalariga muhabbat va sadoqat ruhida tarbiyalash, ularning isteʼdod va qobiliyatini, ezgu intilishlarini roʼyobga chiqarish yoʼlida boshlagan katta ishlarimizni bundan buyon ham qatʼiyat bilan davom ettiramiz.

Аyni shu maqsadda yurtimizning barcha viloyat va tumanlarida, shahar va qishloqlarimizda yangi-yangi taʼlim dargohlari, madaniyat va sanʼat maskanlari, sport inshootlari barpo etilib, yoshlar ixtiyoriga berilmoqda.

Shular qatorida poytaxtimizda bunyod etilgan muhtasham “Gʼalaba bogʼi”, “Shon-sharaf” muzeyi, Toshkent shahrining tarix muzeyi, betakror Аdiblar xiyoboni farzandlarimizni milliy va umuminsoniy qadriyatlar ruhida kamol toptirishga xizmat qilishi shubhasiz.

Yoshlarimizni jismoniy sogʼlom, maʼnaviy yetuk insonlar etib tarbiyalash uchun besh ijobiy tashabbus doirasida koʼplab stadionlar, suv havzalari, sport majmualari va saroylari barpo etilmoqda.

Eng muhimi, farzandlarimiz oʼrtasida sport bilan muntazam shugʼullanadigan, sogʼlom turmush tarzini oʼz hayotiy maqsadiga aylantirgan yigit-qizlar safi kengayib bormoqda.

 

Qadrli vatandoshlar!

Bugun jonajon Oʼzbekistonimizda erkin va obod, farovon hayot qurish yoʼlida biz boshlagan ulkan ishlarni davom ettirishga qodir boʼlgan yangi avlod shakllanmoqda.

Аziz oʼgʼil-qizlarim, hech qachon unutmang, xalqimiz, Vatanimiz sizlardan buyuk ishlarni kutmoqda.

Shu muqaddas ishonch va masʼuliyatni har tomonlama oqlash, unga munosib boʼlish – dunyodagi eng ulugʼ baxtdir. Shunday baxt, shunday sharaf barchangizga nasib etsin!

Sizlarni sevimli bayramingiz, azmu shijoat, goʼzallik va kamolot ayyomi – Yoshlar kuni bilan yana bir bor samimiy tabriklab, barchangizga sihat-salomatlik, baxt va omad tilayman.

 

 

Shavkat Mirziyoev,

Oʼzbekiston Respublikasi Prezidenti

 

www.president.uz

Oʻzbekiston Respublikasi Prezidenti Shavkat Mirziyoyevning Namangan viloyatiga tashrifi boshlandi. Davlatimiz rahbari dastlab Pop tumanida barpo etilgan “Nuran uz” meva-sabzavotchilik klasteri faoliyati bilan tanishdi.

Pop Namangan viloyatining hududi jihatidan eng katta tumani. Prezidentimizning foydalanishdan chiqib ketgan qishloq xoʻjalik yerlarini oborotga qaytarish toʻgʻrisidagi tegishli qaroriga muvofiq, tumandagi unumsiz toshloq yerlarni oʻzlashtirish boʻyicha dastur ishlab chiqildi.

Ushbu dasturga asosan “Nuran uz” masʼuliyati cheklangan jamiyati tomonidan Pop tumanidagi adirliklardan iborat 1 ming 885 gektar oʻzlashtirilmagan yerda meva-sabzavotchilik klasteri tashkil etildi. Joriy yilning bahorida bu yerda 100 gektarga oʻrik, 70 gektarga gilos koʻchatlari ekildi, 12 gektar yerda uzumzor barpo etildi.

Ispaniyadan keltirilgan “Magador”, “Maryblon 29c”, “Flopria” navli oʻrik koʻchatlari hosildor boʻlib, ikki oyligidayoq nishona koʻrsatdi. Bu bogʻ kelasi yildan toʻliq hosilga kiradi va gektariga 70 tonnagacha meva beradi. Bu har bir gektaridan 50 ming dollarlik meva eksport qilish mumkin degani.

Klaster egalari bu bilan cheklanib qolmasdan, bogʻ qator oralariga qovun, tarvuz ekdi. Ayni kunlarda gʻarq pishgan shirin-shakar tarvuz-qovunlar Rossiya va boshqa bozorlarga eksport qilinmoqda.

Qirq yillar mobaynida samarasiz yotgan yerlarda intensiv bogʻ yaratishga innovatsion asosda yondashilgan, suvni tejaydigan tomchilatib sugʻorish texnologiyasi joriy etilgan. Ushbu tizimni klasterning oʻzi yaratgan boʻlib, bu 50 foiz mablagʻni tejash imkonini bergan. Buning uchun 180 metr chuqurlikdan suv chiqariladigan 4 ta quduq qazilgan. Toʻliq kompyuterlashtirilgan tizim chanqagan yerlarga avtomatik tarzda suvni yuboradi. Yaʼni, hamma ish inson omilisiz, kompyuter orqali boshqariladi.

Bu - ikki bosqichli loyihaning dastlabkisi boʻlib, 2021-2022-yillarga moʻljallangan keyingi bosqichda yana 1 ming 455 gektar yer oʻzlashtiriladi.

Loyiha toʻliq amalga oshirilgach, 350 ta ish oʻrni yaratiladi, yiliga 10 million dollarlik meva-sabzavot mahsulotlari eksport qilinadi.

Ushbu foydalanilmay kelgan tashlandiq yerlarda obod bogʻ barpo etish oson boʻlgani yoʻq. Klaster buning uchun yerga tuproq soldi, unumdor texnologiyalar olib kelindi. Bu, albatta, yurtimizda foydalanilmay, qarovsiz yotgan yerlarni oʻzlashtirib, aholiga daromad keltiradigan maydonlarga aylantirish boʻyicha boshlangan saʼy-harakatlarning mevasi.

Davlatimiz rahbari bogʻni koʻzdan kechirdi, shu yerda nuroniylar, qishloq xoʻjalik xodimlari bilan suhbatlashdi.

Namangan viloyatida tumanlarni muayyan qishloq xoʻjalik ekinlariga ixtisoslashtirish, jumladan, Kosonsoy, Chortoq, Yangiqoʻrgʻon tumanlarini bogʻdorchilikka yoʻnaltirish lozimligi qayd etildi.


- Boshqa yoʻlimiz yoʻq. Yerimiz jannat, bundan foydalanib, Namanganni boshqa hududlarga namuna qilishimiz kerak, odamlarni uygʻotishimiz lozim. Yilma-yil foydalanish sharti bilan yerini, urugʻini, koʻchatini, mablagʻini beramiz, qolgan harakat odamlarning oʻzidan boʻlishi kerak. Shunday qilmasak ertaga natijamiz boʻlmaydi, - dedi Prezident.

Shu yerda Namangan viloyatida qishloq xoʻjaligi sohasini rivojlantirishga oid loyihalar, istiqbolli rejalar muhokama qilindi. Davlatimiz rahbari qishloq xoʻjaligiga bunday yangicha yondashuv Oʻzbekistonning yangi qirralarini, yangi imkoniyatlarini amalda namoyon etadigan tizim boʻlishi kerakligini taʼkidladi.

Mutasaddilarga tumanlarni aniq ekin turlariga ixtisoslashtirish boʻyicha qaror loyihasini tayyorlash, bunda har bir hududning iqlimi, imkoniyatlarini hisobga olish yuzasidan topshiriqlar berildi.

OʻzA

Soʻnggi yillarda mamlakatimizda oliy taʼlim tizimini tubdan isloh qilish, talabalarni oʻqishga qabul qilish jarayonida shaffoflikni taʼminlash, yuqori malakali mutaxassislar tayyorlash sifatini oshirish, taʼlim jarayoniga raqamli va pedagogik texnologiyalar hamda zamonaviy usullarni keng joriy etishga alohida eʼtibor qaratilmoqda.

Oʻzbekiston Respublikasi Prezidenti Shavkat Mirziyoyev raisligida 8-aprel kuni koronavirus pandemiyasiga qarshi kurashishda joylardagi ishlar natijadorligi tahlili hamda oziq-ovqat xavfsizligini taʼminlash, aholi bandligi va daromadini oshirishning muhim manbai boʻlgan tomorqachilikni rivojlantirishga bagʻishlangan videoselektor yigʻilishi boʻlib oʻtdi.

Surxonstat.uz
Welcome to Surxonstat   Click to listen highlighted text! Welcome to Surxonstat Powered By GSpeech
Tugmani bosing Tinglash
Tugmani bosing Tinglash